女人街兩邊都有好多食肆，咩菜式都有，今次難得行完街仲好早，見平時多人排嘅泰國菜無乜人，即刻入去試下先啦🤩
1. 涼拌牛肉沙律 （$148）
泰式嘅沙律一向都酸辣開胃，呢個牛肉沙律都唔例外，除左嫩滑嘅牛肉之外，仲有好多香口嘅炸蒜片，生洋蔥同蕃茄仔，配上酸辣汁非常可口👍🏻開頭食可能覺得辣，但習慣左之後就食到停唔到口😋
2. 招牌燒牛肩胛肉（$138）
份量十足嘅燒牛肩胛肉，炭燒嘅牛肉肥瘦適中，大慨５成熟左右，加啲檸檬汁🤤佢有兩碟汁比你點，一碟係泰式酸辣汁，另一款比較特別，綠色嘅原來係芫茜汁，點燒牛肉原來都幾夾呢🤗
3. 炸女婿蛋（$78）
菜名好特別，點解要炸女婿呢🤔不過唔緊要，呢個炸女婿蛋非常好食，炸到隻蛋黃糖心半熟，最好味係個汁，甜甜地，連埋面頭大量炸蒜一齊食🔥蛋嘅軟加蒜嘅脆同埋個汁，真係食炸蛋中嘅天花板👍🏻
4. 泰式海蝦炒金邊粉（$88）
呢碟金邊粉一嚟就見到三隻蝦🦐🦐🦐金邊粉炒得比較濕，材料好鮮，蝦好爽口，啲芽菜好清新，仲有啲蝦乾好有口感，味道都係酸酸地好開胃😁
飲品叫左一杯泰式檸檬茶梳打($33)同泰式綠奶茶($33)🤭☀️兩杯都適合解辣，綠奶茶仲好滑呢🥰
