愛上米線 (美輪大廈) (Closed)

返工晏晝放Lunch想食得簡單啲，見到呢間裝修幾新穎嘅愛上米線唔洗等位，又見到餐牌除咗湯米線，仲有撈米線同泡飯揀，主食加$18就可以有一個小食同飲品，就入咗去試試～餐廳食物中規中矩，不過呢個價錢就略貴咗啲，值得一提係店員好有禮貌，送上泡飯時更特登提醒我哋魚肉有細骨要小心享用，服務加分～紅燒牛𦟌湯米線牛𦟌腍滑入味，薄薄一片帶點鹹，米線爽口彈牙唔會散，份量唔算好多一個女生食就啱啱好，湯底略淡如果濃味啲就更好～芫茜皮蛋脆鯇魚湯泡飯芫茜份量充足，皮蛋口感香滑，湯泡飯特別採用日本珍珠米，比一般泡飯嘅飯粒更有咬口！話梅小番茄大推呢道小食！小番茄上枱就已經剝好皮，甜甜酸酸嘅味道好似一道甜品咁，清新又解膩～麻辣豬耳朵爽脆豬耳配上麻辣汁非常惹味，辣度拿捏得剛剛好，唔會搶味。