今晚帶咗屋企長輩一共六個人去食飯，預先已經喺WhatsApp訂咗枱，預訂咗一隻八寶鴨同釀鯪魚。去到嘅時候，再嗌咗半隻霸王雞，同埋一碟酒糟炒油麥菜。
首先上嘅係霸王雞，上菜嘅時候，以為佢嚟咗一隻雞。因為份量非常充足，就咁睇size，真係似而家出邊食飯嘅一隻雞嘅份量。
飯店哥仔話，鹽焗雞同霸王雞都係一樣，分別係霸王雞上邊有薑蔥而鹽焗雞係冇的。雖然好老土，但係雞好滑，雞有雞味喺而家香港嘅食肆唔係必然的。
八寶鴨更加係功夫菜。首先要將鴨骨起好，在釀入糯米，栗子，鹹蛋黃各樣嘅餡料酥炸而成食嘅時候外脆內軟味道層次豐富。食嘅時候淡淡都係肉同餡料，我家少爺非常欣賞，因為佢太唔鍾意噒骨啦。
釀鯪魚真係唔係度度都有得食。首先要將鯪魚拆肉起骨，再配合豬肉臘腸各種配料打成魚滑，在讓返落條鯪魚入邊。淨係聽到呢啲程序都知道呢味餸唔簡單。
呢間係一間位於大圍好耐嘅飯店，裝修各樣可能未必有集團式嘅餐廳舒服，但係佢哋嘅服務態度好有人情味，小店嘅魅力確實唔係集團式嘅餐飲可以媲美。 最後，碟頭相當充足，叫餸嘅時候千祈唔好眼闊肚窄。
