呢間樓上西餐廳叫「合十」，餐廳位於港貿中心，由港鐵站可以直接穿APM到達，非常方便。餐廳裝修以露營為主題，有室內及戶外區域，戶外區域更設有幾個帳篷，不過我地去果晚帳篷內的座位已經被訂滿，戶外其他位置都掛滿好似星空的小燈泡，非常有情調。
「合十」採用QR code自助落單，店員提醒每晚甜品都是限量供應，可以先點然後選擇後上。我地點左一款甜品、一款小食、一杯Mocktail、一杯Smoothie加埋餐廳好有人氣的巨型豬扒，兩個人share應該好夠食。
阿婆的秘密 $48
呢杯Smoothie個名好有趣，賣相都好吸引，由新鮮蘋果加上紅茶製成的沙冰唔會太甜，味道清爽醒胃。:)
攞你命三千。粒 $48
由多款雜果加上蜜桃汁、紅茶炮製的Mocktail賣相精緻，入口香甜而且富有水果香味。
牛油果蟹肉他他脆餅 $88
一碟有3件的牛油果蟹肉他他脆餅蟹肉份量都唔少，蟹肉混入牛油果蓉特別鮮甜，配以脆餅，口感更豐富。
巨型豬扒跟薯菜 $188
最期待的巨型豬扒份量真係非常大，兩個人分享都好滿足，豬扒好厚身，全熟的巨型豬扒仍然保留到肉汁，豬肉味濃郁，配菜的煙肉卷同薯條都唔錯。
特濃咖啡配心太軟伴雪糕 $88
呢款特濃咖啡配心太軟伴雪糕好有驚喜，雲呢拿雪糕香滑有雲呢拿籽，心太軟朱古力味香濃，加上espresso，一甜一甘，一冷一熱，為呢餐加上一個完美的句號。
埋單每位$250，性價比唔錯。👍🏻
