先講下地點，位於觀塘工業區，地鐵站一出，行大概5分鐘就到，都算好易搵。
食物方面，要預先落單，因為所有食材同份量都係新鮮準備，如果walk in 去既話，真係唔知會唔會摸門釘😅
我地一行5人，佢推介我地食菌皇伴大鵝掌餐。價錢都只係 $1680，除開每人都只係$336，真心抵食。
什菌大蜆豆腐湯
顧名思意，個湯係用左什菇、大蜆、豆腐去煲，湯既味道清清甜甜，蜆比想像中大隻，而且份量都多、食落淡淡肉。
麻辣鹵水拼盆
拼盆入面有牛肚、手撕雞同豬腸，唔係講笑，食完之後，麻辣既味道仲停留喺口腔入面一陣，果種感覺都幾過癮。而3款小食之中，我最中意既係豬腸，因為d豬腸洗得非常之乾淨，而且夠哂入味。
大肉蟹
可以揀花雕雞油蛋白蒸、避風塘炒、薑蔥炒，胡椒炒或者四川香辣炒，實有一款岩大家。我地最後都係揀左薑蔥炒。原因係，因為我地覺得薑蔥係最野味。肉蟹非常大隻，食落啖啖肉，肉質鮮甜，而且蟹殻上都沾滿哂薑蔥汁，真係忍唔住吮多2啖。
蒜蓉粉絲蒸蟶子皇
蟶子下面鋪滿左粉絲，吸哂了蟶子既精華，而蟶子大大隻，面頭鋪左好多炸蒜蓉，聞落已經覺得好香。蟶子食落啖啖肉，而且爽口又鮮甜、熟既程度岩岩好。
薑蔥炆龍躉腩
雖然都係薑蔥，但薑蔥真心好味，食幾多次都唔會厭。龍躉腩係用左炸粉炸過，但粉漿又唔會過厚，咬落去果一下，外脆內嫰，肉質唔會鞋。
菌皇伴大鵝掌
呢碟餸真係令我大開眼界。平時雜菌都係食開好普通既菇類，但今次鵝掌側邊係用左鹿茸菌、野生黑虎掌菌同姖松茸，呢幾款菌類即刻令碟餸加了唔少分。
士多啤梨骨
呢樣係我其中一樣中意食既餸，士多啤梨醬汁酸酸甜甜十分開胃，而且好厚肉，肉質腍嫰，送飯一流。
招牌御膳炒飯
因為啲餸嘅份量實在太多太大碟嘅關係，個炒飯黎到時候都已經覺得好飽了，不過個飯真係炒得好甘香，入面有蝦同帶子等等做炒飯材料，而且飯粒分明、夠晒乾身。
紫薯布甸
作為今晚晚餐結尾嘅一道甜品，紫薯味濃，不會太膩。
總括來講，呢間私房菜性價比高，值得再回頭。
