登堂 (Closed)

之前行過先知原來觀塘開左個新既商場The Wave，大廈原本應該係工廈，但係改裝之後變得好靚，仲有好多唔同餐廳入駐。登堂係M1集團既餐廳，之前我都食過幾次其他餐廳，所以好期待呢間新開既餐廳。登堂佔左大廈一層，空間十分寬闊，我諗二人到十人枱都有，裝潢都好靚，今日去個陣仲播住marvel片。入番正題，整體食物質素好好，價錢亦合理。我地首先叫左個龍蝦湯，個湯好香龍蝦味，上面少少忌廉可以中和本身個湯既苦味。然後我地叫左一個pasta，係澳洲和牛肉醬手肉貝殻粉，貝殻粉我覺得煮得有少少硬，不過肉醬好入味，加埋和牛真係好正。跟住重頭戲就係威靈頓牛柳，雖然我未食過威靈頓牛肉，但係都知坊間唔少都煮得麻麻地，所以好期待呢度既威靈頓牛柳。切開外面酥皮，酥皮唔會散開，入面牛肉肉汁豐盛，口感軟嫩，幾乎一切就切開。鬆脆既酥皮同牛肉既配搭，令我地食完都大讚。最後甜品叫左蘋果批加自家製雲呢拿雪糕。蘋果批都係酥皮底，但係都唔會覺得太油，熱辣辣既蘋果批加上凍冰冰既雪糕，好快已經比我地食哂。我地叫左兩杯飲品，都係比較特色既飲品，加上飲品本身唔會太甜，值得推介。