今日要落嚟觀塘做嘢，中午約埋朋友一齊食晏。觀塘人多車多，好彩美食嘅選擇一樣咁多。今次就揀咗呢間口碑唔錯嘅「神木日本料理」。
餐廳嘅裝潢好別緻，門面以仿竹林作設計，店內嘅布置亦很有特色，以和風及木系為主軸，配上天花嘅油紙傘及牆上嘅面譜裝飾，色彩繽紛豔麗，令人眼前一亮！
午餐選擇非常豐富，共有 14 款，定價由 $68 - $108 不等，每款均附有茶碗蒸、是日小食、味噌湯，另外還會奉送罐裝汽水/紙包飲品/熱華田或熱檸水，+$8 更可轉特飲。
特選壽司定食配烏冬 ($88) 率先送上。茶碗蒸口感細滑，蛋味亦十分香濃。味噌湯暖笠笠，入口有麵豉香，味道不會過鹹。
1
壽司有三文魚、赤貝、白身魚、赤蝦、TORO 蓉軍艦、加州卷等，全部嘅刺身質素都好高，尤其是係三文魚，新鮮肥美，TORO 蓉富天然魚油香，入口即溶。
另外佢哋嘅醋飯水準亦唔錯，無論係酸度同黏度都恰到好處，再伴以滑溜嘅烏冬吃，口感一流。
至於另一客黑蒜油叉燒拉麵 ($78) 亦係人氣之選，拉麵是以豚骨湯做湯底，加入秘製黑蒜油，再配以叉燒、木耳絲及蔥花等傳統配料炮製而成。嘗一口，湯底帶濃郁蒜香，叉燒有三大片，火炙過，肉質肥瘦適中，既軟滑又有肉香。
餐飲方面，友人點咗藍柑乳酸梳打 (+$8)，天藍色，賣相好靚，睇落好清新；而我就揀咗熱柚子蜜 (+$5)，入口微酸微甜，味道唔錯。
