臻味冰室豬扒酸辣米線

臻味豬扒米線本身係觀塘區有一定名風，唔單只有YouTuber介紹過，仲每日都好多打工仔支持！今個月終於進駐埋九龍灣工廠區啦🙌🏻係人流超多嘅常悦道開咗一大間分店，目測坐到100人呀，卡位為主，坐得舒服又乾淨，價錢仲要十分平價，單餸米線先40幾蚊，搞到呢排同事們成日話要去食xd

😋講講嘢食先！
💫秘製豬扒最值得試，坊間好多浸咗湯嘅豬扒通常冇乜口感、或者好乾身好’鞋’! 偏偏臻味做到 「肉質好 又入味」，真係稱得上係第一豬扒！臻味仲一d都唔孤寒，次次叫豬扒到有兩、三塊，滿到都食啲豬扒先見到d米線，哈哈

💫另一個重點係湯底，個酸辣好特別，重酸反而唔係太辣，有同事叫到大辣都仲要自行加辣椒油，個酸主要來自秘製酸菜粒👍🏻好味道
酸辣以外仲會食食下feel到麻，會食到條脷痺晒，唔中意麻辣嘅朋友可能要試下其他湯底！

💫米線偏硬冇乜彈力，應該係成碗米線唯一扣分嘅地方

除咗豬扒，我仲有試過自製韭菜餃、牛脷，呢2款配菜都值得一試，牛脷唔會硬，都幾入味！

九龍灣嘅打工仔如果諗唔到放lunch食咩，絕對可以一試👍🏻