華嫂冰室 (皇廷廣場) (Moved) New Location

聽講話哩度既"招牌菠蘿包"好好食，成日想試好耐，上次黎到又咁岩撞正佢內部裝修，今日終於都有機會可以試下佢地既食物喇可能係朝早既關係，黎到門口唔使等位就入到去坐，望左Menu最後order左一個"招牌菠蘿包"同一杯凍奶茶。水吧效率好高，落完單好快就黎左order既凍奶茶。凍奶茶嗒落比出面冰室多少少茶味，茶同奶既比例都算均勻，而甜味亦都適中。廚房亦都不遑多讓，岩岩飲完第一啖凍奶茶之後，"招牌菠蘿包"亦都送到面前。俾手機食左第一啖之後我亦都即刻起動口感方面，包身溫熱，口感亦很鬆軟。菠蘿皮很脆口，但好易散，食完之後碟面佈滿既都係菠蘿皮碎。煎蛋同蕃茄令菠蘿包口感層次更加豐富，但其熱力亦都令牛油溶得好快，令到食落只隱約感覺到牛油既味道但係就感覺唔到牛油咬落去既感覺。味道方面，菠蘿皮味道都偏淡，菠蘿包原有既味道亦被煎蛋同蕃茄既味道蓋過，令食落感覺同食緊用焗爐烘過既甜餐包整既分別唔大。總括以上，哩度既食物幾有創意，諗法亦都幾新鮮，價錢亦唔太貴。但食物質素方面，就有少少見面不如聞名，但不仿一試。