西餐大排檔 (Closed)

銅鑼灣原來有一間食西餐嘅西餐大排檔， 絕對係西餐嘅質素大排檔嘅價錢， 而且裝修格局一啲都唔大排檔， 一出𨋢口就已經見到有隻啤啤熊 ，前面仲擺咗好多餐牌， 畀你睇啱揀啱先入去食。我哋叫咗個黑松露蘑菇湯，一上枱已經聞到好香蘑菇味 ，非常香濃， 而且入面仲有好多磨菇碎粒， 絕對係一碗高質素有誠意嘅忌廉蘑菇湯。黑松露年糕亦都係另外一個必點嘅選擇， 年糕煙煙韌韌 ，因為年糕本身係冇味， 配埋個忌廉汁食味道剛剛好。主菜我叫咗個美國慢燒牛肉， 因為慢煮嘅關係可以鎖住肉汁，所以牛肉味好重，加上佢又有好多配菜，平時我哋食嘅都係薯蓉，但係今次呢個佢用咗紫薯蓉，非常之有心思, 仲有一兜菠蘿 ，酸酸甜甜，因為份牛都幾大份，食滯咗都唔驚，可以食番菠蘿減返肥膩感。