1
西九龍中心二樓呢個位置嘅餐廳成日都易手得好快🙈，今次開嘅新餐廳係屬銀杏館旗下，亦都係社企餐廳，特意聘請長者👴🏼做侍應👍🏻，豐盛耆年。餐廳做越南菜，所以改名食哂字叫做「越老仔」，有意思有意思。
由於新開張，所以都等咗成十分鐘先有得入～就睇住Menu等啦，每日有幾款精選午餐($49)就包埋自助飲品吧🍹，但未必啱食嘅就睇返佢主餐牌，有小食、湯粉、撈檬等等。
我同同事Share食，就叫咗一個C餐金不換炒牛肉飯($49)🐄。Well嚟到發現唔通我哋嘅理解有錯，點解唔係炒飯嚟嘅？而係炒牛肉+白飯🍚，味道都幾好食嘅，炒得幾香幾夠味，但我心目中係食炒飯👉🏻👈🏻。如果係咁嘅牛肉飯，有更好嘅選擇。側邊有搭啲青瓜同蘿蔔，但味道偏淡麻麻地。餸同飯嘅份量都唔算多，男仔應該唔夠食。
另外要咗碗單點越老蕃茄蟹肉湯檬($56)，都有幾多餸嘅，例如蝦🦐、魚蛋、豬紅、蟹膏🦀、扎肉同蕃茄🍅，每樣都有兩嚿到，但蟹膏真係少到不見😠。個湯底我覺得一般，茄味有點假又唔鮮，同埋太多蔥/生芽菜果啲，令臭青味太重。
午餐Set就包自助飲品吧，價值$12/位，有菊花茶🌼、凍紅茶、有機柑桔蜜🍊等等，亦都可以沖熱飲☕️。飲品就唔錯嘅，又可以任飲👍🏻。
總括嚟講，社企餐廳值得支持嘅，食物味道就正常啦，唔係好啱我胃口，有機會都可以試下其他嘢食嘅。定價我覺得喺呢區少少偏貴，例如非lunch set要成$5x碗😕。服務方面，老友記都好落力，又主動介紹餐牌，但始終有啲啲生手，有少許混亂，不過可接受😊。環境就乾淨企理，但少迫。
