又係下班後，已下定決心去呢個餐廳食架啦，上次經過既時候，好驚喜會有漢堡店係西九中心入面開，所以今次幾乎係特登為呢間野而去深水埗架。佢入面感覺好典雅，同西九中心感覺簡直係強烈對比，環境衛生都相當舒服架！
1
見佢餐牌，覺得佢呢個價位係深水埗/西九中心開都幾大膽，因為檔次感覺上係兩回事。
我地就叫左兩個漢堡餐，一個係紐約經典牛肉漢堡，另一個就係美國西部漢堡。
細味漢堡之前，就黎左薯條，呢個薯條簡直一大驚喜，完全可以話係一流，佢一啲都唔油膩，炸到金黃既脆度剛好，幾乎係食過最好味既薯條！
仲有呢個新解鮮既沙律。
呢個就係紐約經典牛肉漢堡，又名好DRY嘅漢堡，佢入面既材料澳洲安格斯漢堡排、煙肉、生菜及蕃茄，首先值得稱讚係佢個漢堡包上下都先烘一烘，好細心；成個漢堡用料絕不欺場，個漢堡因為無醬汁，全都依賴晒安格斯漢堡排本身入面既肉汁，口感乾身單調，味道平實，乾身真係將呢個漢堡扣減左好多分。
因為有好DRY嘅漢堡比較下，突出左美國西部漢堡既美味，佢既材料同樣用澳洲安格斯漢堡排、洋蔥圈、芝士、生菜、蕃茄，重點係佢有秘製醬汁。可以話呢個漢堡個靈魂係個醬汁到，再加上哂洋蔥圈既惹味（瘦身女重嫌個洋蔥圈細咗啲？），佢比經典漢堡高出一半既分數，係無可厚非架，秘製醬汁同漢堡肉汁既交融真係令人幾回味。
要講令瘦身男女留下印象，可埋會返轉頭食多次，呢個未必係，但環境真係唔錯，而薯條更係首推，如果去開深水埗，又食厭左深水埗果幾間好鬼出名又好鬼抵食既地道小食，都可以黎西九龍中心呢間試試既。
