89 (Closed)

8月31日係我生日，細妹請我食晚餐，我建議去西九龍food court, 貪佢選擇多！行咗兩個圈，超過四十間舖，眼花撩亂，最後鍾情呢間～鮮蝦水餃米線，盛惠$25。我霸位，細妹幫我買、幫我攞，拎嚟嘅時候，第一個感覺係～滿滿的！好大碗！鮮蝦水餃有四隻，係木耳鮮蝦餡，隻隻脹卜卜，絕不欺場！米線份量好多，軟硬適中有彈性！湯面有好多芽菜同少量炸菜，我好喜歡芽菜，並分咗啲俾細妹。由於我本身食得比較濃味，所以我覺得啲湯鹹啲好啲，我撈咗少少細妹個三餸餸汁，最後全碗清哂！好味！好飽！好滿足！誠意小店～值得推介！多謝細妹請我食生日餐！唯一最唔滿意嘅係環境同座位，勁多人、勁逼、啲櫈又斜，我著西褲屁股成日跣落嚟，坐得好辛苦！P.S.：飲品喺另一間叫《萬里》嘅買～茉莉鮮奶茶加紅豆(少糖)。