漁道樂 (Closed)

真係好掛住好掛住日本，所以無時無刻都想食日本菜！呢度裡裡外外嘅裝修都超級日本風，幻想自己飛咗轉先啦！呢度雖然主打浜燒海鮮，但仲有壽司、刺身、天婦羅、燒物，鍋物等等，選擇非常多！今次我地樣樣都試啲，日本生蠔從來都唔會令我失望，大隻得黎又鮮甜滑溜，必食！明太子燒玉子，蛋燒得非常嫩滑，配埋滿滿嘅明太子，帶出微辛嘅味道，外軟內脆。刺身同壽司都不錯，推薦油甘魚刺身，入口甘香！另外我最鐘意呢度有職員幫手燒海鮮，可以一邊歎住美食一邊欣賞佢燒，因為我最怕自己會燒到過晒火！大推浜燒蟹甲羅，裡面放滿蟹膏及蟹肉，再放上蔥花、生鵪鶉蛋同埋蟹籽，食落係幸福嘅味道，加咗蟹籽咬落仲脆卜卜，成件事昇華咗，要多兩碗白飯，thx！活貝盛合都好正，鮑魚黎到嘅時候仲識郁，非常新鮮！燒貝殼類嘅時候會加埋清酒一齊燒，好味到連啲汁都飲晒！石燒和牛，牛肉脂肪比例均勻，非常軟腍！