亞萊泰菜 (Closed)

見教育路開咗間新嘅泰國菜就入去試吓。舖頭唔算大，但係裝修幾靚好有泰國感覺。青木瓜沙律，酸酸甜甜好好味，前菜黎講好開胃，啲料又多，食落好爽口，好清新。炸蝦餅半份，即叫即炸，好香好熱，食落去淡淡蝦肉，唔點醬都好好食，點埋個甜酸醬，我真係以為自己去咗泰國。菠蘿炒飯，出邊啲菠蘿炒飯係就咁一個炒飯加啲腰果同埋雜豆就算，依度唔係咁簡單，佢仲有啲海鮮喺度，加咗少少茄汁，估唔到同菠蘿嘅甜味係咁夾！依個菠蘿炒飯真係好出色，估佢唔到，可以話真係要試吓。泰式鮮蝦炒金邊粉，即叫即炒，好多蝦好大隻，配料都好多，撈埋一齊酸酸甜甜有少少辣好好味。同菠蘿炒飯係兩樣唔同嘅嘢，但係都係必叫！真係好正，唔會後悔。原個椰青同埋椰汁冰，個椰青好甜好嫩，飲晒啲椰汁之後，就咁起啲椰肉都好容易起到，唔硬，好鮮甜。椰汁冰都好有椰子味，甜得黎唔假，好正。