圍威喂 (荃灣廣場) (Closed)

荃灣廣場又有新餐廳，仲要係泰國菜梗係要試吓，餐廳走玩味嘅路線，餐廳裏面嘅畫作係香港插畫師嘅作品，色彩鮮艷繽紛!! 香葉肉碎炒飯，一上枱就好香好香，有啲泰國餐廳肉碎係伴碟冇真係同飯一齊炒，但呢度就有炒過當然會香啲好味啲，呢碟係最快被K.O.嘅，好快清晒！青咖喱豬頸肉，另外加個手工薄餅嚟點咖喱食，手工薄餅有兩大塊食落幾脆口，青咖喱唔算辣但就好有泰國香草嘅味道，亦見佢落咗好多青檸，豬頸肉肉質幾好，食落唔會覺得好肥膩!! 泰式青木瓜沙律，食咁多肉梗係要有個沙律中和一下，青木瓜紅蘿蔔絲芽菜配上酸酸地嘅沙律 汁好開胃!! 壓軸出場嘅係泰北燒黃油春雞，隻雞好大隻好多肉食，表皮燒到好香脆，調味好好而裏面肉質都keep到嫩滑!! Share食會有少少唔方便... 麻煩晒朋友幫手切開啲雞肉!! 飲品我點左木瓜奶，一見到我係諗起台灣多過泰國，朋友就點左牛油果奶，我哋都覺得生果味幾濃厚，所以兩杯都好飲!! 以後想食泰國菜喺荃灣區又多個選擇啦~