潮丸 (Closed)

喺筲箕灣想食碗魚蛋粉一啲都唔難，呢間潮丸點解會喺度開舖？我諗係想憑靚裝修同較少有嘅潮式湯底行另類路線。大門口鋪懷舊地磚、金色熊仔配街市價錢牌，新舊結合，就係佢想行嘅路線。我呢碗嘅牛爽腩好腍，筋位爽口，不過都有啲肥肉，係好係壞就睇個人口味喇。牛腩份量幾多，而且睇得出係同一塊肉度切出嚟，唔會比啲碎腩人。朋友食嘅撈麵都睇得出係比較彈牙嗰種，上面嘅鹼水味如果加湯食就唔會太重。份量超多，男人都食唔晒。小食方面試咗炸鯪魚球同墨魚丸，新鮮炸好夠脆夠香。比較鍾意墨丸，真係有墨魚粒，而且唔粉，幾彈牙。本身以為呢種新式麵店水吧唔會太到位，估唔到杯鴛鴦沖得唔錯，有咖啡香又唔酸，甜度啱啱好。一大班人想坐耐少少食碗粉，又想食得乾淨企理，可以試吓呢間另類粉麵—潮丸。