三和敘

Open Now

Now Closed

臨近黃昏5點幾覺得好餓，男胖子見我等唔到食晚飯，就提議不如試下呢間嘅late lunch,5點半就last order, 我地就快手落埋單。個set 大致上有刺身，一個小食同一個main course 咁，仲有飲品任飲同甜品，要成$498一個人，實在係有啲奢侈，但偶爾都要被人寵壞一下。日本產蘋果汁好解渴，蘋果味好香，唔太甜，酸度亦剛好。刺身一睇啲色澤就覺得係上等貨色有深海池魚，呈半透明，唔腥而且鮮味十足！赤貝好爽口！最唔捨得食就係肥拖羅，睇下啲紋理幾細緻，入口好順滑，一咬即融。龍蝦肉份量都唔少，炒得好濃郁惹味，肉質爽彈。呢個和牛入面有蔥油，牛味重，點旁邊嘅淡雪鹽食都幾特別。炭燒鰻魚飯同野菜稻庭烏冬相對普通左啲，但啲飯粒均勻沾鰻魚汁，加分。吉列黑毛豬扒蛋飯，呢個好驚喜，蛋呈半熟狀態黐住啲黑毛豬扒，好吸引，味道好好味！豬味好香，可惜男胖子只係留返一舊同堆飯比我，想喊甜品就有雪糕，分別係清香柚子味同令人想醉嘅威士忌味。食完之後上左樓上參觀。