今次食 lunch 再次行到過嚟，再次係因為之前想去食，但係睇完餐牌就決定不了，今次就應細佬（壽星公）要求去食。
其實呢到嘅座位唔算多，我諗係因為預咗人買嘢食入戲院睇，而中午時份過嚟都要用小小時間搵位，搵到位後都快快落單等食嘢了。
等咗大約十分鐘，首先出去拎媽媽食嘅焗飯，但係拎完冇耐兩個炒飯都拎得了。
五香肉丁香蔥炒飯（$58，另轉牛奶加$6）
因為係即炒，所以未食都感受到個飯嘅熱力，而且都聞到五香肉丁同蔥嘅香味。
食落又唔覺得好油，呢樣對於我嚟講係一件好事，而且飯粒爽得嚟又夠軟熟，證明師傅炒得都唔錯。
不過份量嚟講我覺得偏少，就算呢幾年我細食咗，我都係覺得如果可以食多幾啖就好。
至於牛奶就「十字牌出品，信心保證」，不過反而令我回味以前喺屋企樓下食早餐必飲嘅玻璃樽牛奶，雖然我都唔記得係咪十字牌，但始終玻璃樽嘅牛奶都買少見少，可以回憶吓都好。支奶除咗都幾滑之外就冇咩特別，我對奶又冇咩要求。
唯一 concern 嘅係價錢問題，我唔知係戲院嘅食品慣性偏貴定係本身十字冰室就係貴，宜家正常出街食飯大約都要四十幾五十蚊，而呢度係講緊飯意類要五十幾六十幾蚊、出前一丁麵餐都要差唔多$50，加上今次炒飯嘅份量，我覺得試一次都可以，但係唔會長期食。（仲要飯係唔入得場食，你話帶得入去都叫做合理價嘅）
