今日山長水遠入黎到元朗，就係為左呢間經常被開心果關注組谷友力推嘅Brava Java，每次睇相見到佢哋嘅開心果巴斯克蛋糕都會不期然吞一吞口水🥹
到達既時候大概兩點半，值得一讚係附近有好多咪錶同停車場，絕對係駕駛友好餐廳！餐廳既枱櫈唔多，白色既葡式瓷磚令餐廳顯得光猛，而我地都十分之好彩唔使等位。
坐低梗係第一時間即刻嗌返個All day breakfast同野飲填下個肚。All day breakfast分別有煙肉版同煙三文魚版，配上搽左cream既bagel絕對能夠滿足哂不同既願望。
之後到左今餐其中一個重點，就係一直心心念念既開心果！我地分別嗌左開心果抹茶鮮奶同埋挪威焦糖芝士咖啡開心果抹茶鮮奶一如想像中帶有濃厚開心果味。而當咖啡一到，大家都不約而同咁嘩左一聲，濃濃既芝士被刨成絲，再舖係焦糖咖啡上面，各種味道交融下令口感更有層次，絕對稱得上係色香味俱全。
食到半飽既我地決定叫埋甜品，非常可惜因為前一日黑雨嘅緣故，我哋試唔到重中之重嘅開心果巴斯克蛋糕。最後我哋轉移目標到餐廳推薦嘅挪威芝士croffle做甜品。同樣地芝士再次刨成絲，但今次就舖左喺脆脆既窩夫上面，再加上微甜嘅楓糖，食落唔會太甜，絕對啱晒香港人口味，亦為呢次元朗覓食記劃上完美嘅句號。
下次再嚟一定要食到開心果蛋糕！！！
