由於食店位於街市上面，因此没有冷氣提供，現場有多部大風扇，唔會覺得空氣焗促。面積頗大，枱同枱之間十分寬敞。
食店提供大路選擇，價錢稍貴，另外需收加一服務費。
好耐冇見既玻璃樽可樂，另外鋁罐裝同樣為$10(未計加一)。
西蘭花炒鮮魷
調味偏咸，必須叫個靚仔一同進食。魷魚份量比想像中多但比較薄身，界花師傅好有心機逐條切，新鮮爽口；同樣地，西蘭花同草菇亦煮得啱啱好，唔會太生或者煮到軟曬。
豉椒炒蟶子
蟶子飽滿冇沙，醬汁ok。配料有洋蔥、青紅燈籠椒，咸咸地好送飯。然而一碟只有5隻蟶子有啲唔夠喉。
避風塘軟殼蟹
呢個有驚喜，炒得夠乾身，食落唔會感覺好油，細細隻方便食用。色香味俱全，同時要留意番後勁有啲辣。
白飯
迷你白飯，大食的朋友可能唔夠飽，個人就覺得差不多。
食完飯大約7:30 左右，現場未見爆滿。
總結
調味偏重，送飯ok。如果朋友唔食得辣的話，辣味菜色記得落單時同職員講聲。
最後埋單大約人均$300，3餸1飯1汽水，價錢稍貴，如果不是太大食的話，份量還可以。
需收加一服務費，没有飯後甜品/生果。
如果相約三五知己食飯，唔洗等位的話不失為一個選擇。
