早一日晚上六6時親身去預約時還沒有什麼人，同佢講要坐冷氣位，因為呢種大熱天時坐室外真心會死人
點知今日就落大雨天氣變得涼涼地，坐室外都好似無咩問題
晚上7時到達已經座無虛席，唔係誇張，一路食既時候都一直無少過人
點了炒涼瓜、瀨尿蝦、燒鵝、蒸老虎班、至尊小炒皇、豉油王中蝦、農家雞蛋焗魚腸同埋蒜蓉粉絲蒸扇貝
炒涼瓜好夠味，吃到口裡最後會回甘，不算太苦
瀨尿蝦D肉好鮮甜，雖然唔重椒鹽味，反而佢落o左D孜然粉，一上檯即使舌頭未品嘗，聞到已經食指大動
燒鵝遲遲都未到，追問之下佢話燒緊，但上檯後感覺唔太熱，皮係脆既，但呢隻鵝太肥仔了點，無咁多肥膏會好D
老虎班值得一讚既係佢真心蒸得剛剛好，沒有過熟的情況出現，魚肉勁滑
小炒皇都係大掛檔一貫水準，魷魚好爽口
豉油王中蝦隻隻都好大，如果可以用美極黎炒就更夠味啦...同埋一定要送飯，唔係都幾咸下
魚腸蒸蛋麻麻，唔係好食到魚腸，而且D蛋太實了，感覺蒸過頭
蒜蓉粉絲蒸扇貝，同樣都係蒸得剛剛好，完全唔會有咬唔爛好似橡膠既感覺，而且佢已經係原隻起o左出黎，唔會有D痴住o個殼，永遠都食得唔乾淨既感覺
見到檯檯都必點燒鵝，又用得燒鵝黎做店名，想必一定係對自家鵝好有信心
黎之前聞說呢度既海鮮同燒鵝都好味，佢都無令我失望
之前去開屯門三聖食海鮮燒鵝，我覺得係勁好味，不過相對黎講價錢都勁貴
呢度絕對係平價版既三聖，呢個價錢黎講有咁既質素，性價比好高
果然街市中係有好多臥虎藏龍既舖頭，好開心屋企附近有D咁有氣氛又性價比高既大排檔
住彩虹既你仲諗？心動不如行動
2
1
