凱富菜館 (Closed)

我地幾個老友，時不時借啲意约出嚟食飯，無他，人齊吹水開心最重要。大家有共識，豐儉由人，有時燭光晚餐，有時街坊飯堂，周圍都食吓。其中一個老友住鰂魚涌地鐵站，佢話带我地去電車路附近食潮州菜。呢間舖裝修好有懷舊feel, 雕花玻璃、清明上河圖……好多熟客係街坊，當然包括我個朋友。我老友係潮州妹，見到啲海鮮即時兩眼發光，心大心細之際，老細話今日返咗啲元朗烏頭，極力推薦！盛情難卻，就叫咗一條試吓。🔸️蒸元朗烏頭有埋logo，原來係元朗烏頭，本地出產，有信心兼夠新鮮。我其中一個賢妻老友話，一向香港以元朗烏頭至靚、至多黄油。佢話潮州人鍾意食凍烏頭， 洗乾淨連鱗一齊蒸，再攤凍食，所以有黃油係特别香同好味道！佢仲提我地要點啲普寧豆醬夾住食，咁樣嗰味更鮮! 諗唔到咁大條魚，一啲都唔嚡口！🔸️煎蠔餅 潮菜必叫嘅例牌之一， 好多人鍾意食佢嘅微脆煙韌， 送飯送粥一流。用料幾足，啖啖蠔仔肉！🔸️ 糖醋雙面黃 分量好大，名副其實嘅兩面黃， 即係麵嘅面同底，兩面都煎到金黃色，脆脆口感。點少少陳醋加少少白糖， 提鮮惹味， 點住陳醋食，仲有助減油膩。難得朋友相聚，吃吃傾傾最開心！