街坊茶記 (Closed)

同小朋友去咗將軍澳嘅冒險樂園放一日電，諗住喺附近平平哋食個晚餐後先走，沿着河邊行行吓就去到雍明商場嘅呢間街坊茶記，見到晚市都有小菜，就一於呢度啦。如店名一樣，呢度裝修簡潔，位置不多，主要都係做街坊生意，晚市有炒粉麵和小菜可選，我哋叫咗「椒絲腐乳通菜炒牛肉」以及「櫻花蝦蒸水蛋」，即叫即炒好新鮮，通菜牛肉好有鑊氣，腐乳香噴噴，非常惹味，牛肉雖然唔係話好多，不過每片都幾大塊，而且都幾腍。至於櫻花蝦蒸水蛋，真係成個面都係櫻花蝦，鋪到密質質，多過我自己煮嗰啲添！😂櫻花蝦係好有益嘅食物，好多鈣質啱晒小朋友，佢個蒸水蛋都蒸得好滑，兩個唔同質感一齊食，送飯一流！小菜附送例湯白飯，碗飯大大碗。飲品要左一杯紅豆冰同埋熱阿華田，質以街坊價來講質素好好啦！