記起好友提起過藍山咖啡專門店，走去試吓先。
入到舖先發現間咖啡店係一間好地道嘅街坊茶檔，之前聽個名完全想像唔到
間舖只有三、四張大排檔小摺檔， 我坐低冇幾耐基本上已坐滿。
野飲選擇好多， 單單係咖啡款式已經有十幾款，我從未喺香港見過一間茶檔可以做咖啡做到咁專，恕我孤陋寡聞
茶檔有飛碟、法包、沙律同麵食。突然有個客叫蒸肉餅，我打左個突， 再周圍望吓，原來仲有個餐牌列左啲家常小菜。
見到個蒸肉餅好似好吸引，好住家feel
黎到藍山咖啡專門店，當然要飲返杯藍山咖啡啦！咖啡聞落已經香，飲落味好香濃、好滑。個芝士蛋飛碟烘得啱啱好，好脆好新鮮，蛋如果冇咁熟就perfect喇。
打完波再飲埋杯咖啡，真係精神晒! 坐喺間茶檔度，發現一個好特別嘅現象，就係全場茶客同伙計一齊傾晒計，但好明顯佢地係喺呢間茶檔度識，講邊個中醫好、講健康資訊。。。我覺得自己好似入左時光隧道， 返返去舊時人與人之間關係比較緊密同埋簡單嘅時候 :)
