The ONE 由 G層 至 L21層，L17層 ~ L21層為空中食府，L12層 ~ L16層為高級食肆，大致上人流集中於 G層 至 L11層；L4層 ~ L5層為主要食肆樓層，其他為 shopping 樓層，行咗幾層，覺得肚餓或口渴，去到L4層 ~ L5層 Take a break！呢個樓層設計及舖排真方便顧客！
我行咗幾層，已經攰攰地，上到 L4層，正是食肆樓層；有 Suzuki Cafe、金牌小龍、北海道雪糕店、金寶泰國菜館、亦有易牙台式料理.....。
見到L3層，有間 T 字頭 Yogurt 店，門口大排長龍，令我想幫襯致興盡失！不如搵間餐廳坐低食下午茶！
易牙台式料理嘅下午茶餐，由廿多元起，免收加一 ( 下午茶時段 )，都 OK 喎！:)
呢個舖位打橫長方形，中間為收銀位，一入去係收銀位，左邊有卡位，右邊近窗有卡位。我坐喺右邊靠牆位置，可以望到店外。
可能係呢個設計關係，侍應經常唔見人，想搵個侍應都要俾啲耐性！
下午茶餐 ：焗田螺酥 配 自選甜品 - 焗西米布甸 $28 熱蜂蜜洛神花茶 ( +$3 )
熱蜂蜜洛神花茶 ：天氣乾燥，飲蜜糖確實合時，可惜味道完全被洛神花味掩蓋。:( 洛神花茶味道及顏色跟利賓納有幾分相似；當然洛神花係天然紅色，後者係人造色素。飲起嚟酸中帶甜，很醒胃，確是下午茶不錯選擇！杯中有 5 朵洛神花，認真慷慨！
洛神花本身酸酸地，有點爽身！可以幫助消化！曬乾之後，就係市面見到嘅紫貝天葵。
其他飲品：珍珠奶茶、柑桔檸檬、荔枝玉露、檸檬紅茶，( +$3 )：薑母奶茶、桂圓蜜、紅棗蜜、.....等等。
除此之外，仲有做緊 Promote 嘅蔬果沙冰，有番茄沙冰、木瓜沙冰、粟米沙冰、青椒沙冰、奇異果沙冰、西柚沙冰，其中以青椒沙冰口味最為奇怪，就算做緊 Promote ，未必有食客敢試！
焗田螺酥：等咗 15 分鐘終於上枱，當我落單時，侍應無預先通知我等咁耐，希望日後可作出改善！:( 一碟兩件，做得很細件，夠精緻！不過食落無咩料！係一口酥，以田螺肉及蘑菇切碎做餡；酥皮焗得好鬆化！又有牛油香味！感覺意猶未盡！
自選甜品 ： 包括焗西米布甸、奶凍、奇異果碎雪肉及柚子碎雪肉。我揀咗焗西米布甸，以一個瓷器皿盛住，剛焗好熱辣辣，略嫌布甸未夠焦，刮開焦面係滑滑燉蛋，味道清甜；內層係西米，並不算大粒，可見是普通 size ；最驚喜竟然底層係用上紅豆！打破一往好餾嘅荔芋茸。值得一讚！我覺得呢個甜品好食過滿記嘅焗荔芋西米布甸。
另外，見到隔離枱食客叫咗奶凍，以酒杯盛住，奶凍面放上柚子肉，賣相唔錯！
附帶說及，呢度唔會先俾杯水給食客，食客要求侍應才會俾！大家請留意！
