茶茶Go

Open Now

Now Closed

星期三係大型超市優惠日，掃完貨之後有啲口渴，就過對面買杯珍珠奶茶飲吓先。登打士街出名多珍珠奶茶店，簡直係珍珠奶茶嘅戰場！見到有間小店，門口有個大嘅雪櫃，專係放唔同嘅甜品，又有得買珍珠奶茶，就決定試吓呢間。行埋啲，仲見到有啲明星嘅應援物資添。望落去，啲甜品都好吸引，而且份量都幾大。好似一個巴斯克蛋糕，都只係$33，除咗原味，仲有伯爵茶、開心果味，仲有特別嘅鹹蛋黃味！其他蛋糕都有Tiramisu盒子、楊枝甘露盒子等等，本身仲見到個虎皮芋泥卷都幾吸引，不過今次就試吓個原味巴斯克蛋糕先，另外再要多杯黑糖珍珠奶茶。枱面放咗唔同size嘅杯，一望就知自己要邊種size，我就要咗大杯，仲大過張4R相！等咗一陣，黑糖珍珠奶茶就嚟喇。而家要用環保飲管，店員會好貼心咁問使唔使幫手𠝹開個膠面，呢點要讚！雖然係正常冰，但係唔會話多到成杯都係冰。飲落去，茶味重過奶，飲到最後啲冰啱啱好溶晒，唔會沖淡晒茶嘅味道，奶茶糖度都啱啱好，飲落去仲有啲回甘嘅感覺，黑糖味就唔算話太濃，正正常常啦。珍珠雖然煮得偏軟身，但都keep到煙韌嘅口感，唔會好似咬橡筋咁。飲管質量都好好，飲到最後個飲管都未變軟。飲完茶，梗係要配埋個蛋糕啦！