——————
🐻🐻❄️都唔係蠔愛好者，但「牡蠣不如歸」用蠔做拉麵嘅主角，喺其他拉麵舖好少見，所以都要去試吓😆！
牡蠣鹽味🍜拉麵
$118
先講湯底，頭啖湯有淡淡嘅蠔味；拉麵配有蠔醬，撈勻之後湯就會變濃；麵條幼細，唔係常見嘅拉麵麵條，食落有啲似蝦子麵🤣但配蠔湯非常適合👍🏽
配料有偏瘦嘅低溫叉燒，加上一啲火箭菜之類嘅配菜，可惜就無蠔🙈
加配咗糖心蛋(+$15)，蛋🥚嘅味道調得唔錯，配埋拉麵一齊食，個麵會多啲層次～
總括而言，比較適合鍾意蠔同淡味拉麵嘅朋友👍🏽
醬漬牡蠣一口飯
$68
蠔由醬油調製而成，配甜甜哋嘅紫菜同飯，食落好夾又好食👍🏽，但🐻🐻❄️都覺得可以唔落青瓜，因為青瓜嘅清新，有少少搶咗醬油蠔嘅味道。
牡蠣野菜天婦羅
$88
天婦羅之中最特別係青椒🫑，入面包咗明太子，咸味就係嚟自明太子，食落有少少辣；天婦羅蠔嘅肉質都依然鮮嫩；其他天婦羅就正常發揮～
餐廳環境好寬敞，枱同枱之間有空間感，🪑座椅都舒適，適合面對面一路食、一路傾偈、傾生意。
結論：🐻🐻❄️覺得小食比拉麵更出彩；所有食物偏淡味，蠔愛好者❤️同偏好淡味嘅朋友絕對要試～
不過因為🐻最愛濃味；🐻❄️又唔太好蠔，所以未必會為咗拉麵再特登嚟😝
