御．八幡屋日本料理 (Closed)

朋友請食飯，見到團購有間放題未試過，上網睇加錢有蠔食喎，就呢間啦。由於日子定得太急，買唔切團購，不過正價價錢亦唔貴。一行四人到步發現客人唔太多，接待職員比咗張6人枱比我哋。總括食物方面好多都麻麻，但係有幾樣幾好而且一心係食蠔，所以都幾滿意㗎。刺身種類多，都幾新鮮，但甜蝦有頭只係比8隻，第2次叫漏埋。呢個係加$50嘅menu，有蠔，油甘魚，帶子，赤蝦。蠔肉無連殼但味道唔錯，有醬汁及蔥花提升鮮味。帶子同油甘魚新鮮，帶子夠厚新，油甘魚夠肥美，有油香，赤蝦亦係無頭，味道一般，雪亦都未溶晒。呢度壽司唔錯，特別係三文魚類嘅夠肥。海膽軍艦呀，食嗰陳陣紫菜仲未淋㗎。各類熟食，味道麻麻，燒墨魚嘴無咩味，而豚肉亦較乾。天婦羅粉漿太厚，下面嘅蝦丸唔錯。升級menu之一嘅黑松露燉蛋唔錯，有黑松露下面有三文魚。韓式芝士炸雞，芝士夠晒多，但係雞似炸咗一段時間。白汁青口似用水烚完淋上白汁，無咩味。芝士焗蠔唔錯，蠔肉夠大隻。南瓜湯有少少酸味。甜品嘅楊枝甘露唔錯，寫咗兩次嘅榴槤大福始終都無嚟。