餐廳喺域多利皇后街，Donki斜對面位置，地點方便。呢度主打食蠔，但都有tea set可以叫。餐廳樓底高，座位舒適濶落，坐得舒服！
Tea set $298/2人用，加一後都只係$328，已包三層架下午茶，兩杯即磨咖啡或茶，而家推廣期內仲送多兩杯有氣酒，仲可以加多$88 upgrade1.5小時free flow。
FIRST TIER
Smoked Salmon Cracker 挪威煙三文魚脆餅，煙三文魚鹹鮮香氣十足，且質感油潤，配埋脆餅一齊食好香口！
Parma Ham & Melon 巴馬火腿配蜜瓜，不死嘅配搭，巴馬火腿肉質柔軟，鹹度適中，味道輕柔，配埋香甜蜜瓜，好正！
Mini Beef and Cheese Burger 迷你牛肉芝士漢堡，漢煲烘到脆邊，同時保持鬆軟，仲有濃濃嘅牛油味，漢堡煎得啱啱好，肉質鬆化，有肉香之餘唔油膩，配上味道酸甜清新嘅酸瓜，剛好平衡一下肉肉嘅感覺！
SECOND TIER
Home-made Waffle 手工窩夫外脆水軟，蛋香十足！
Chocolate Brownies 朱古力布朗尼，賣相精美，朱古力味香濃，重點係唔會太甜！
Macaron 馬卡龍外層酥脆，入口陣陣杏仁香氣，同樣甜度適中。
THIRD TIER
Panna Cotta 意式奶凍，口感滑溜，每口都散發住淡淡嘅奶香，仲有士多啤梨做點綴。
Crème Brûlée 法式焦糖燉蛋，面層焦糖香脆，但個人唔太好甜，如果焦糖可以薄啲就更好，燉蛋蛋香十足，仲有雲尼拿嘅清香。
Apple Crumble 蘋果金寶，面頭鋪滿脆脆，下層蘋果粒香甜軟腍，加上肉桂嘅香氣，食落有口感，亦有層次。
Matcha Latte
我嘅matcha latte，抹茶味甘香，濃郁，同奶量平衡得好，唔會太多奶而蓋過茶香。
Americano
閨蜜話佢嘅Americano亦唔錯，咖啡香氣十足，味道香醇。
難得一個tea set我款款都鐘意食，而且每人都係二百蚊有找，性價比高，值得下次再嚟！
