Red Ant Restaurant (Closed)

MegaBox紅螞蟻曾經一度執咗笠，最近發現原址重開，以前食物都唔錯，所以今次再試一下，發覺保持水準，而且價錢唔貴，餐廳唔算多人，服務殷勤，我會再幫襯。



鐵板滋味雜扒
賣相唔錯，好夠熱，雜扒包括牛扒，雞扒，豬扒，腸，煙肉，每一樣份量唔多，但食完夠晒飽。牛扒生熟程度剛剛好, 肉質柔軟, 出奇地, 煙肉同埋肉腸味道相當唔錯，以$118個價錢來講係抵食。

慢煮豬軟骨定食
呢個餐屬於每晚定食推介，價錢$78，豬軟骨醃得好入味，軟骨的確軟，容易入口，以呢個價錢係超值。

例湯
以上兩個套餐都包括例湯，我哋選擇羅宋湯，個湯出奇地足料，而且好夠濃，份量唔算多但滋味，最特別係跟湯上嘅三小磚蒜蓉多士，味道跟一般蒜蓉焗田螺一樣，相信佢加入嘅香草牛油和蒜蓉跟焗田螺係一樣好味。

熱奶茶
有茶香，不過奶落得少咗。