和安里呢條小路可能入啲啦，入面啲餐廳價錢通常都無咁貴。而最近呢度就多咗間韓國嘢同點心店，落老蘭食點心又幾過癮，哈哈！
食物種類幾多，先點咗個涼拌嘅海蜇皮蛋。海蜇好多條，皮蛋都切得大件，份量都幾多，芝士好香，個汁酸酸哋好消暑～
個腸粉真係睇住師傅即整，雖然個皮唔係好透薄，但係非常滑呀，好味道！👍🏻牛肉都塞到好滿，好足料！
抹茶流沙包淺綠嘅顏色好治癒呀，哈哈 😄 個包唔係好鬆軟，但係綠茶味好濃烈，仲有啲蛋黃粒，個味道好夾。鍾意食綠茶嘢嘅話，一定要試試～
蝦餃皮薄餡多蝦，蝦肉算彈牙結實，而且有四件𠻹！
用海膽整燒賣都幾新穎，海膽鋪得好滿，個樣好吸引～ 朋友話鍾意海膽刺身多啲，我就覺得都唔錯。
朋友問點解點兩款燒賣，因為我想試新嘢又想食「正常版」燒賣（笑）。正常版燒賣嘅魚子好多，蝦肉同蝦餃一樣都係大大粒！
拉絲芝士蒜香春卷入面係油炸鬼，成條都係芝士，每啖都食到～
我同朋友夜晚嚟食，兩個人先食咗兩百幾蚊就食到咁多款點心同食到勁飽，真係抵食！😋
