JK Kitchen (Closed)

永光中心附近有好多餐廳，但係越菜餐廳就冇咩。入到去裝修好雅致，格調簡單，舒服既感覺，好似係大海咁。叫左越式豬頸肉湯檬($68)，越式米紙卷($58)，蓮子薏米冰($46)。蓮子薏米冰超級足料，一大杯椰子沙冰，圍住好多粒蓮子，底部有1堆薏米。椰子清甜，蓮子唔苦，而且薏米甜甜地，蓮子and薏米都係自己煲，健康有益，又養顏，第1次見越菜餐牌有尼個選擇，必試。lunch特飲加番差價。越式豬頸肉湯檬既湯底係自家製，冇味精，食完唔會口乾，湯底唔多油。麵身唔太"林"，份量足夠1個男士，可能仲有剩......芽菜另上，自己選擇落唔落。豬頸肉亦另上，燒得唔會乾哂，仲保留肉汁，上面鋪住d蔥油，好似平時食蔥油雞既醬汁，愈食愈惹味。越式米紙卷4件既內餡有大蝦，豬頸肉，最估唔到隻蝦既size咁大，餐廳特別在於，米紙卷面頭有花生碎，加上有甜醬，亦有可以自己加，令淡淡地既米紙卷食落多左入甜味，平時其他餐廳都唔會落甜醬，尼個新組合好match。總體，質素高，價錢比其他同類餐廳平幾蚊，服務非常好，唔該前多謝後。好多上班一族lunch time黎食。食物上菜速度亦快，所以岩哂上班人士食，唔駛等咁耐。值得再食。