328茶座

Open Now

Now Closed

早幾日幫襯完648買咗包韓國慶南蠔煮咗個日式拉麵食。唔知係唔係因為我貪嫩口煮得唔夠熟，定係經其他途徑中咗某啲細菌或病毒，總之結果就係肚痾，痾完接連幾日冇哂胃口。對於新近榮升卓越食家嘅我嚟講，無疑等同廢咗寫食評嘅大半武功。於是乎我唯有食清淡啲，食評照寫！唔係藍田人，甚至就係藍田人，都唔一定知道藍田其實好大。從五桂山腰嘅碧雲道一路由廣田至興田再迴旋處轉落德田、平田，落到匯景花園都係藍田，步行要行哂，大概要兩個鐘。呢間舖頭，實際上應採用區議會嘅分區正名標識，位於藍田嘅「廣德」選區入面。今朝早我就嚟呢處嘆早餐嘞！茶記早餐，首要奶茶掂。同場四間舖我都試過哂，呢一間係最掂嘅！至於個通粉，嗱！粉太爛，肉丁慳皮咗少少，畀多兩粒就好啲。個人口味，我其實好憎呢種台灣式厚多士，我鍾意正常方包厚度嘅多士。雙蛋對我呢啲無蛋不歡嘅人嚟講，總係好味道。