炭家 (Closed)

之前bookmark咗呢間專係食鰻魚嘅日本🇯🇵餐廳。星期五晚上8點幾，咁啱喺呢度附近辦完事，喺冇訂枱嘅情況吓諗住去睇吓有冇得食。店員話冇訂枱嘅話只有最近門口嘅bar枱坐…其實我冇乜所謂，只要位置唔太熱就可以。坐低後店員問我要熱茶定係凍茶，嘩～原來有凍茶供應喺熱到high high嘅天氣下實在太正啦。點了個鰻魚重 (HKD420) - 有茶碗蒸、小鉢、日式清湯及白飯。茶碗蒸裡面原來有鰻魚，有驚喜喎。小食係切粒鰻魚(我食咗少少先記得影🤪)，鰻魚出面包住一層透明啫喱。主角蒲燒鰻魚，肉質唔算肥美厚身，不過去骨去得夠乾淨(我試過食蒲燒鰻魚有碎骨🙈)。我食嘅鰻魚有部份燒得比較燶，所以味道有啲苦。鰻魚皮好靭，醬汁得好少，唯有靠花椒粉增加味道。飯粒好乾，可能因為醬汁太少嘅關係。甜品係一串菠蘿，味道幾甜。食物OK，日本人講求嘅服務水準喺呢度完全搵唔到👎🏻👎🏻。站在店門口超過半分鐘，要有日籍師傅從廚房玻璃窗提示樓面才有人招呼。店員放低杯茶後就走咗，餐牌係我自己拎嚟睇。店員可能覺得一個人來食飯就應該自己拿餐牌及不需要店員介紹餐牌上的菜式吧。