小魚兒 (寶漢大廈) (Closed)

之前經過小魚兒已經好想去試下，位置超級方便！銅鑼灣寶漢大廈喺地鐵站C出口對面就係啦！一入到去就見到是日推介，竟然有澳洲龍蝦好似幾吸引！蒜蓉牛油龍蝦（$198）呢個價錢真係超抵，去酒樓食話唔定係得Double價錢，餐廳仲講明龍蝦足一斤！龍蝦表面鋪滿蒜蓉，有蔥花作為點綴，豆芽作伴碟，龍蝦上碟嘅熟度剛好，蒜蓉嘅香味滲透入去龍蝦肉，蒜蓉帶出龍蝦嘅鮮味，蝦肉爽口彈牙，好juicy！另外嗌咗佢哋新推出鮑汁花膠鮑魚粗麵，撈粗上面灑滿左蝦籽碎！撈粗煮得非常乾爽，趁佢熱辣辣嘅時候同埋鮑汁撈埋一齊，麵條掛住花膠鮑魚汁，加埋燒龍蝦嘅蒜蓉仲有風味😃！壓軸出場嘅係海鱸魚毛血旺！今次揀咗BB辣，店員溫馨提示 水滾後5分鐘即可開餐，呢個烤魚盤裏面有豆花、牛柏葉、魷魚、芽菜、木耳、青瓜仲有好惹味嘅生洋蔥圈，最重要嘅係，有寬粉墊底，吸收晒花椒辣椒青椒嘅汁！重慶style嘅烤魚夠晒惹味，魚肉非常嫩滑，今次我哋揀咗海鱸魚，因為佢夠大條同埋少骨，性價比好高，鍾意川菜嘅人就唔可以錯過啦！值得一讚嘅係，呢間餐廳仲有樓下「一芳」代購服務，連門口都唔使行出去，就有水果茶飲啦！