夢工房西日料理 (Closed)

今日去咗葵芳行街， 行到兩點左右， 有點攰想搵個地方坐低食下嘢， 見到有間餐廳門口寫住88蚊任食放題， 放題嚟講價錢唔算貴， 所以去試下。餐廳裝修行美式風格， 動漫英雄人物和電影嘅佈置， 座位坐得幾舒服。入門口見到有一個好大嘅飲品櫃和雪糕櫃， 飲品方面選擇都幾多幾齊全， 雪糕都有好多款選擇例如韓國雪條，意大利雪糕等等。有多款壽司和拉麵選擇質素都唔錯， 魚生都幾新鮮， 有款xo醬火炙肥牛壽司幾特別， 我之後都叫多咗幾件， 可以一試。炸物和其他熟食都做得幾出色， 呢個價錢絕對抵食， 我特別鍾意佢個酥炸單骨雞翼， 脆身香口， 呢個都叫多咗幾件。甜品仲有chocolate mousse cake 和 cheesecake等選擇 ，餐廳仲有個爆谷機， 應該係定時整爆谷， 食落都好脆。