皇室冰廳 (Closed)

今日係附近間「皇室冷廳」食lunch，見個皇牌焗飯系列太吸引，仲有得揀豬扒、雞扒或魚柳，都可轉焗椰香咖哩。焗飯需要等10分鐘，亦都準時出餐俾我，焗完真係香噴噴，睇見面層個芝士焗得幾靚。豬扒超大塊，仲大過塊面，而且細心地切塊，再拎去焗，唔使刀已經好方便進食。豬扒厚薄適中，肉質嫩彈，易咬且多肉汁，但又唔會整濕個飯，加左芝士更滋味，新鮮蕃茄微酸帶甜，配埋多汁菠蘿，好開胃美味。最正係雞蛋炒飯底，焗飯先會更好味，焗完都會夠乾爽好咬，粒粒分明。整個飯份量足，食完夠飽肚，味道又好，配熱飲 +$5，熱奶茶好味，個茶底香濃有茶香，而且唔澀，奶又夠滑。當日lunch set太受歡迎，有d已售罄，要食真係要早少少去，見包埋靚湯，幾吸引。