莆田 (美麗華廣場2期) (Closed)

今日約左朋友出尖沙咀行街，朋友一見面就話不如去食豪d！原來係莆田搞緊個海蠣節，朋友帶我黎莆田食蠔。餐牌話用養足300日嘅海蠣，每日產地直送到港，仲有6款煮法，只係$188，就可以任選2款菜式，當然試試佢啦！我地揀左漁民鹽漬海蠣同頭水紫菜海蠣煎蛋。漁民鹽漬海蠣第一啖食落口覺得有d咸，但越食越想食，蠔嘅鮮味慢慢出黎，個味道感覺有d似腐乳，幾有趣，如果配埋飯更加完美。紫菜海蠣煎蛋份量都幾多，食落口感其實有d似蠔餅，不過係厚版！蠔仔細細粒，非常新鮮，數量都幾多，啖啖都食到蠔，加埋d紫菜，濕濕地，有d汁，食落唔會太乾身，唔油膩，唔錯！食完後，我地加左個酥炒芋芯，外酥內糯，食落比較粉身，感覺有d似反砂芋。表面甜甜地，做甜品都幾岩，好滿足呀。總括黎講，莆田海蠣節嘅菜式都幾有特色，估唔到原來蠔都可以有咁多種食法，有機會會黎試埋其餘四款，睇下有無驚喜先！