滿屋廚房 (Closed)

鑽石山間Fullhouse Kitchen，真係覺得呢間餐廳好得意。大概有半個鋪位係售賣日常用品，有得外賣雞蛋仔，而家仲有好多特式飲品同咖啡等等，最入面就係餐廳座位。近期發現Fullhouse改咗餐牌，由原本嘅東南亞菜式，變成賣西式牛角包、意粉、甜品等等。海蝦意大利粉。蝦隻份量都幾多，意大利粉用橄欖油炒得爽口彈牙，帶點點辣味，非常惹味。炒意大利粉本身就係要帶少少油份，呢度亦處理得幾好，並不油膩。墨魚仔忌廉蝴蝶粉。估唔到呢度兩樣海鮮意粉都幾好味，無論海蝦又或者墨魚仔都新鮮爽口，好有咬勁。忌廉蝴蝶粉配搭得剛剛好，少少creamy，又夠濃郁。小龍蝦沙律牛角包三文治。沒有大期望，反而有驚喜。餡料爆滿，小龍蝦都唔錯，份量多之餘，又係幾有咬口。沙律亦都好清新，配上牛角包，感覺新鮮香脆，配搭得宜。甜品仲試埋牛角包麵包布甸，用牛角包做嘅麵包布甸真係第一次食。因為係用牛角包，麵包層特別酥軟，同一般軟淋淋嘅麵包布甸好大分別，個人覺得呢個配搭比傳統嘅更加好食。布甸甜味適中，再配上雪呢嗱雪糕，好味。