花月冰室

Open Now

Now Closed

呢間茶記喺iSquare對面，早/午/下午茶/夜晚都有唔同嘅菜式供應，店內環境光猛，仲有上下兩層，上面較為闊落，有大圓枱適合聚餐。下午茶時間為兩點半至六點，而晚市套餐由五點開始，如果想食下午茶又想叫小抄嘅就建議喺五至六點之間入嚟，相對嚟講最抵食🤣招牌菜為秘製肉骨茶，無論係賣相定係質素都絕對比得上高級餐廳，用鍋上，四大件軟嫩又入味嘅肉，附上吸滿湯汁嘅腐竹同豆卜，加埋鮮甜雜菇，湯底味道香濃但無藥材味，老少咸宜，配上軟糯白飯，令人一試愛上，性價比高，大推💓 下午茶款色眾多，除咗有炒粉飯麵焗飯常餐之外，亦有中西式嘅下午茶餐，主食有吉列魚/豬、香煎/蒜香雞、雞翼、雞髀等，炸至外層脆身，唔油膩，肉質嫩滑，啖啖肉。中式搭配邪惡致癌腸仔、兩隻蛋、蘿蔔糕同粟米粒粒，西式有沙律或者薯條，整體搭配好Match，會回訪。