Menu 嘅 design 好特別，cover 用咗學生時代嘅單行簿，內文嘅字體刻意用咗類似手寫嘅，旁邊仲加咗唔少插畫，十足十以前喺簿入面畫公仔咁。餐單就似係以和風食品為主，第一次嚟唔知食咩好，都係揀廚師推介最穩陣。
三文魚丼
同行者比較細食，於是點咗呢個細細嘅三文魚丼。賣相係好樸素，簡簡單單都可以好美味。
牛肉定食
呢個定食嘅份量完全係丼飯嘅 5 倍。成個定食有麵豉湯、拌菜一小碟、牛肉冬粉、白飯配飯素，仲有嘢飲添。果碗牛肉嘅大小同丼飯差唔多，食完都飽咗一半啦，牛肉有做得好入味，我本人極力推介呀！
蕉糖梨子窩夫甜品
梨子甜品唔係咁常見到，仲特別用咗軟淋淋嘅 waffle 做 base，淨係聽個名都引死人。味道清甜而且唔會膩，圓碌碌咁造型又可愛，為午餐作結就最恰當。
聽講平時經常排長龍，我今日真係算好彩。用餐期間感覺到真係幾舒服、幾悠閒，我諗我會再返嚟，希望下次到唔駛排隊啦。
