於是就上OpenRice睇吓附近有乜嘢選擇
黎到門口已經見到好多人排隊等外賣
入座之後，見到隔離左右都係食緊燒味飯
於是，我哋兩條友就叫咗兩個雙拼飯同埋一個醉雞捲，仲有佢自稱無添加味精嘅湯添
個湯有冇味精我就飲唔出啦，不過係幾好飲嘅
嗰日嘅湯係蘋果雪梨，聽講日日都唔同㗎
終於兩個飯到咗 個樣唔食得都睇得！
不過落單嘅時候唔記得要半肥瘦叉燒
又唔記得話要燶邊
所以嚟到嘅叉燒都偏瘦，不過瘦得黎又唔係好un
值得一讚嘅係脆皮燒鴨，個皮好脆好食！
滷水鴨嘅滷水味唔算太重，都係好食嘅！
最欣賞嘅係佢每個餐都有啲芽菜托底，既可以去油膩，食肉食到濟濟地嘅時候，又可以食返啲爽口嘅芽菜中和一下，呢個做法其實幾聰明！
另外到醉雞捲啦，其實平時都冇乜點食開，
不過見到咁多人推介，都忍唔住想試試佢
試完之後其實都冇乜嘢特別嘅感覺
可能冇得同平時嗰啲比較
個人認為花雕味道都重，但係又未至於重到會苦，而下面嘅青瓜絲，就索晒啲酒味啦！
係咪全元朗最好食嘅燒味我就唔敢講啦
因為去食嘅時候，唔係佢新鮮出爐嘅時間
不過一路食，一路都見到好多人斬料返屋企㗎！
對我來講，今餐係舒服嘅一餐
