每一次食一間未食過嘅食店前, 我例必上呢個網站睇下先至決定食唔食!但呢間新開, 所以無從入手, 本打算食尖沙咀同樣擺設與食物嘅某一食店, 但一見到要等好耐已打若干折扣, 再睇清楚各位朋友報告知道仲要限時個半鐘就立即唔會去, 因為我個人比較健康奉行慢食, 況且, 打邊邊同食燒肉一樣, 個半鐘無可能食到! 就算食到都係食不知味, 咁就不如唔食......或者搵另一間同類店舖食, 就係喺咁嘅情況下試下呢個喺「OPENRICE」無人食過又唔知好唔好食嘅店鋪食一次!
食店喺地庫, 可能收唔到網絡, 但食店好細心, 設有WI-FI。而陳設亦非常似地道嘅韓國燒肉店! 仲有就有嘅係間隔幾好, 三五知己可有共聚空間!
對我牛魔皇嚟講, 梗係要食呢個啦! 牛舌唔差, 其他都係水準可以嘅韓式燒肉牛肉質數。
1
牛脥肉, 未食過, 原價$168, 新張期內$68就一試。但大部份都有筋難咬, 叫做試過就算, 好在唔係168啫!
1
豬心肉比牛脥肉好少少, 無咁靭, 但我都係唔太喜歡。
總括對於我嚟講, 唔係限時或限時任食嘅食店我先會去, 絕唔會去一啲店大欺客, 又要等得耐又限時嘅食店去食就己符合基本條件。牛脥肉與豬心肉我就麻麻, 但食嘢呢方面其實見仁見智。若各朋友想去食呢間食店, 尤其係喜歡牛肉嘅可以一食, 其他食物就要睇下閣下口味啦!!!!! 至於服務及環境, 喺我用膳時全程只得5份1坐滿, 且始終新開, 所以服務非常殷勤且所有設施都係新嘅, 所以非常乾淨!!!故此我結論係不妨一試!
