難得約返舊同事叙一叙，相隔兩年再次返到令人懷念既北角站，基本上沒有太大改變，除了多了好多類型的新食肆。
今次由舊同事介紹黎到呢間係於馬寶學林既【滾得囍宮廷火鍋小炒】
估唔到係呢棟以教育中心、補習社為主既馬寶學林入面會有一間高質火鍋店而且離北角A2岀口行2分鐘就到達，非常方便就腳。
整間餐廳以宮廷風格為但偏向感受到中國傳統精緻，大門前堂既呢張龍椅夠氣勢吧!
金黃色既主色，造工精緻，唔自拍一張點對得住自己。帝王級享受啊
入面裝潢以木材雕花鏤空設計
爐餐具更用了景泰藍!!!!
店員將我地帶到一張兩人小桌，每張坐椅上都有用紅色既絲綢坐墊包着，感覺古色古香之餘，仲好舒服添。
檯面上面有一卷.....「聖旨」
呢到可以選擇既湯底大大話有成15種咁多, 而且每款都係特色湯底, 最受女仕歡迎, 必定係花膠雞湯鍋!但我選擇了慈禧酒香香麻油雞鍋湯底。因為「酒香香麻油」這些字眼很特別呢！
每張飯桌上都有一個小小既獨立調味架，包括紅椒、芫荽、蒜蓉、蔥，選擇不多，但已經好足夠。因為心想有好既湯底，調味品就變得不重要了。仲有前菜有成4款添！
很快地, 湯底、火鍋食材都已經上檯了。
慈禧酒香香麻油雞鍋湯底(半隻) $188淨係聽個名已經夠高貴，雙龍頭湯鍋，簡直氣派逼人，雞件分開上而且已煮熟，雞既顏色澤鮮嫩, 不會肥膩, 雞肉已預先熟左8成左右, 稍為放入湯底滾一下就可以食得！
店員將花雕加入麻油雞點火將雞肉燒香，視覺效果一流，由最初既酒香味慢滲岀陣陣既麻油香，香氣迫人。
麻油雞湯底真係好吸引啊！之後再加入高湯慢慢煮熟就大功告成，由麻油湯鍋煮熟左既雞肉，滲岀點點既酒香麻油香！雞件也夠肉質幼滑，雞肉帶微微既鮮甜肉味，大讚👍
先飲一啖湯試試,味道濃郁而且麻油酒味好重！正！
火鍋配料方面更加係誇張有很多是自家出品，有超過100多款既選擇，簡直係皇帝式享受。
我們旁邊有張Poster Promotion 既滾得囍海鮮拼盤...見佢平平地又幾吸引就深深忍唔住點了。
滾得囍海鮮拼盤 $368拼盤由貴妃蚌、沙白蜆、聖子皇、新鮮海蝦、青口及扇貝組成，海鮮新鮮色擇靚，而且肉厚豐滿。
尤其係聖子皇，外殼包住滿滿既聖子肉，望到是都流晒口水，最利害既係煮熟後依然多肉，天然鹹鹹地既海鮮味加上彈牙既口感，真係非同小可。
另外新鮮海蝦都唔輸蝕，珍寶級既海蝦，肉厚新鮮，而且鮮甜，足夠塞滿整個口既蝦肉，感覺就是大滿足。
沙白蜆肉細細，但加上醬油食下食下又幾過癮。
其他既扇貝、貴妃蚌、青口當然同樣咁好食，整體黎講新鮮，清甜，爽滑彈牙。其實呢個海鮮拼盤$368真係好抵食！
黃金響鈴另外海鮮拼盤仲送上一碟黃金響鈴，即叫即炸既響鈴上到枱仲熱辣辣，滿口鹹蛋黃鹹香，食到停唔到口！食過返尋味。
店員說可以不用淥，就這樣直接吃一樣好味！
除左海鮮之外，今晚焦點莫過於呢份手切飛驒和牛。
手切飛驒和牛(180g) $388飛驒和牛價錢唔平不過裝修別致但作為和牛絕對物超所值！
花心思去令到呢樣日式點的肉類變為中式感覺加上伴碟既擺設既華麗又幽美，飛驒牛源自日本岐阜縣，係合乎標準既和牛種，而且可以生食，近兩年最為活躍，絕不輸比神户牛。
我建議原味吃，不要蘸豉油或其他配料！
牛肉既油花分佈平均，輕輕煮過6,7秒，和牛肉質柔軟，入口即溶，味道鮮甜，牛脂亦較多簡直係極品。牛味仍然可以係口中慢慢散發
講究健康，所以我哋都有叫蔬菜拼盤，平衡一下
滾得囍蔬菜拼盤 $68
蔬菜有益健康，又可以消濟，清清口入面既油膩感，選擇多自然心多多！
蔬菜拼盤最適合選擇困難既我，入面有齊所有既菜種，包括唐生菜、皇帝菜、油麥菜、娃娃菜、菜心苗，每種都新鮮又顏色夠鮮！食得招積，滾得出色啊！
最後最後加埋呢兩碗起沙既紅豆沙同綠豆沙，甜甜蜜蜜既感覺為整個晚餐畫上一個完美句號。
總結而言, 呢間係香港好少可有咁舒適又質素高既火鍋餐廳。
店員話老闆係設計師所以好有個人諗法想客人吃得舒服點，呢間店既裝潢都是由他設計的！很棒啊！
環境舒服、食物質素好、員工服務又到位、價錢比平時費點點，但款式外面又吃不到的！所以今餐令生活品格提昇了。
