翡翠拉麵小籠包 (Closed)

今晚食飯去咗翡翠小籠包，其實各區嘅翡翠小籠包我哋差唔多都經常幫襯。佢嘅裝修有花過心思。我哋出街食飯除咗食物本身之外，進食嘅環境都係好緊要嘅。如果唔係不如喺屋企煮。我個人對於一啲開放式廚房一向都會畀高啲分， 因為畀到人哋一份乾淨，放心嘅感覺。今晚我哋點咗三樣嘢都唔係我哋平時食開嘅， 因為想試下其他嘢。點咗生煎包可以替代我哋食開嘅小籠包，酸辣湯拉麵去換左我哋食開嘅炒年糕。另外點左個前菜就係炸脆鱔，但係忍唔住手點左我嘅至愛蘿蔔絲酥餅。呢度既生煎包佢個底係煎到脆嘅。咬落去啲肉汁唧出嚟再加埋脆嘅底，感覺好特別但係又配搭得好好。呢度嘅拉麵幾彈牙。酸辣湯嘅酸同辣比例啱啱好，唔會太酸又唔太辣同埋啲配料好足。炸脆鱔係第一次食味道好好因為有啲酸味醬汁加鱔味，同埋出嚟嘅時侯仲好熱。唯一美中不足嘅係冇乜肉，可能因為炸過嚟有少少食薯條嘅感覺。呢度嘅蘿蔔絲酥餅我真係百吃不厭。外邊嘅酥皮好脆咬落去裏面啲蘿蔔絲切到好幼又好多汁，口感非常之好 。但係食嘅時候要小心啲 因為用油炸過係好熱嘅。如果你哋鍾意食上海嘢，翡翠小籠包一定唔可以錯過！