尤其叫餸食飯, 打邊爐都係適合同一班朋友去好d
約咗好幾次, 終於人齊可以試新野, yeah!
火鍋頭是新派潮食的火鍋餐館
食好野之前, 當然有做過功課啦~
見到Openrice食評中的足料湯底已經口水流
六人一早訂定位好d
火鍋頭內的環境乾淨, 檯與檯之間一點都不狹窄, 大家都坐得舒服
我地呢張檯可以坐到6-8人, 而且仲有2個爐添, 可以叫多款湯底喎
用具乾淨到咁, 事前唔使再用滾水洗一次啦
未人齊, 先點一渣竹蔗水先
透明的玻璃樽, 材料清晰可見, 估唔到連飲品都咁足料
飲一啖, 是清甜的竹蔗味, 而不是死甜, 越飲越口渴果d
打邊爐下火清熱必飲健康飲品之一
人未齊, 唯一可以做既, 就係影相同睇下個Menu先啦
九格調味任你落! (醬油費每位$18)
好啦, 終於人齊, 大家決定要2個湯底, 方便d又可以滿足到更多人既願望!
在座幾位女生就緊係想點有養顏作用的招牌花膠冬瓜濃雞湯啦
大大鍋金黃色的香濃雞湯, 係咪好足料呢?!
侍應先把半隻雞拎起, 佢撈起的時候, 見到好大隻花膠
但係我竟然......打哂成程邊爐, 係無食過一舊呀, 我唔記得左有花膠呢個材料呀
(我要下次再食過!!!)
侍應先把墊底的冬瓜快捷剪成一舊舊, 試想想, 冬瓜煲淋後, 吸收所以湯的精華, 會係幾咁好味
然後再將半邊雞同樣剪成一件件放番入湯底內, 要滾起才能吃得
有人已急不及待試了一口湯, 濃得黎唔係起膠那種, 沒有漿口感覺, 我更鐘意, 漿口的飲完一碗會飽咗
真正的煲冬瓜 XD, 勁入味
而男士那鍋呢, 就係秘製胡椒豬骨煲
喂...又係咁多料
面頭仲有大量大隻蝦乾, 又有d蔬菜配料
滾到中途, 胡椒粒開始起作動, 食物唔蘸辣椒豉油都有胡椒的辣味
也可見一粒粒黑色的胡椒粒, 胡椒湯對身體好, 有袪風作用
滾到無耐, 侍應仲好幫手咁幫我地撈起d豬骨, 大大小小果度起碼有6-7舊,
唔撈起就真係放唔到其他配料落去喔
有d仲可以食埋入面既骨髓添, 好補架喎! 不過本人對淋pat pat既口感有點抗拒, 留番比愛吃既朋友食
2個湯等佢地煲下出下味先
喪吃得的朋友, 唔想空肚打邊爐, 所以點個餐前小吃冰鎮花螺填一填肚先
食咗一粒, 已經比人KO哂啦
花螺用酒醃過, 好香甜而肉質夠爽, d肉唔會無味道, 好味呀!
雖然想encore, 但無理由嘥咗胃既位置唔食打後既食物呀
見佢呢度都好多海鮮配料, 朋友論住點
有d海鮮更係新鮮生猛起近門口的魚缸拎出黎架, 所以每天既價錢都不同
珊瑚蚌, 桂花蚌係打邊爐必點的
鮮橙色大大隻的珊瑚蚌非常爽口, 我最鐘意
牛也是打邊爐的必點配料, 呢度有個極上牛肉拼盤
一碟有齊幾款牛牛: 本地手切肥牛 (有半肥瘦, 有瘦), 牛胸爽, 安格斯牛, 雪花牛立方, 五種不同的牛牛
不是賣廣告, 我本人不是"牛精", 每種我都有食過, 真係好好味
單看已知係靚肉, 色澤鮮, 雪花油脂分佈得平均, 入口腍滑有肉的香味, 沒有一件是韌
雪花牛立方都不需焯太耐, 咬下油脂bi出黎, 感覺超juicy超正!!
呢個係半肥瘦本地手切肥牛, 都咁鬼靚
白色像肥膏的就是牛胸爽了, 究竟佢係牛既咩位置呢?
當職員May姐捧上檯時, 特別向大家介紹及點樣食先最正
(其實每道配料上來時都會作介紹, 而且講得非常生鬼, 令我們一行幾人都食得非常開心)
牛胸爽其實係牛胸與牛肺之間的脂肪, 切成薄片, 滾大約十秒, 見其變成粉粉白白,圈埋就可以食得
本人一向怕食肥膏或淋pat pat的, 呢片出奇的爽脆, 而且帶有油香味
特級安格斯手切牛, 看....油脂分佈都平衡~ yum yum
就算本地手切都無諗過唔使點趙
太多食物的關係, 丸類只係點咗2款:
手打芥辣墨魚丸 & 梅菜豬肉丸 (May姐推介)
芥辣墨魚丸的芥辣唔突出, 不過爽口彈牙
而推介的真係無介紹錯, 將平日阿媽蒸飯的肉餅變成一粒丸狀, 是媽媽的味道, 好味!!!
其他配料都好新鮮, 熟既不在講, 連刺身都頂瓜瓜
雖然食既次序已經亂哂龍, 不過想吃, 幾時都食得既
友人見海鮮咁生猛, 想點幾款試試, 不過侍應姐姐見我地圈了幾款, 就建議不如來個直接點個刺身拼盤啦
拼盤包裝大隻既牡丹蝦, 帶子, 水母, 北寄貝等, 另外韓國BB活象拔蚌是另點的
嘩....好大盤呀, 賣相超得超新鮮
我最想試的水母刺身, 起出面未食過, 亦無見過
水母即係海浙, 但是刺身就未吃過啦
透明白色蘸上醬油, 很鮮很爽, 好得意, 推介!!! 其他可以不吃, 呢個真係要試試
席間朋友點了很多很多配料, 我也不是每樣都吃過
不過以他們的評論, 大家都極為滿意
湯底料多味真, 食完又唔會勁口乾
最後由May姐推介的2款日本酒, 左邊是梅酒, 右邊是sake
May姐對日本酒有深入的研究, 大家想飲咩口味就懂介紹幾隻給大家
日本清酒是要雪凍才好喝, 酒精度大約15%
今次May姐推介右邊這枝口味清醇的大吟釀, 酒味不太濃也不辣, 很啱女生飲, 不過都有15%的
至於男士認為較甜的梅酒, 加冰飲就最好不過
如果酒量好的, 2者混合提升酒味, 亦可減低梅酒的甜度!
每次一大班朋友吃飯都會飲少少酒精, 放鬆心情又可把歡樂氣氛提高!
加埋May姐說話的搞笑本色, 佢對食物及日本酒了解夠深, 風趣又幽默, 真係好想叫埋佢一齊食
咪走住.....埋單前, May姐仲送左每人一張2選1的優惠劵 (1個月內有效期):
我想....七月前會再來encore的
