今日嚟到位於海港城嘅六公館品酒食飯，望住呢個無敵大海景食物飯，感覺相當有格調。
藍花白碟襯上雲石枱，帶點藝術色彩。
睇睇佢哋其中一張menu先，我哋今日寫咗菜單俾佢，所以菜式上同menu有唔同。
嚟品酒，今晚就當然要準備酒水。同佢現場開咗兩支酒，一支New Zealand Riesling $688 同一支Italy Chianti $788，其他自備。
進入菜式部份，第一道，首先係龍井燻太爺鷄。上枱嘅時候佢連埋陣煙一齊，即場上枱再打開，煙霧彌漫之中太爺鷄登場。有好大嘅煙燻味，鷄肉滑身，個人認為配上今晚我哋自備嘅 Côtes du Rhône Village 就相當之夾，能夠令兩者互相提升。
第二味係法國邊豆欖菜金柱炒飯，普普通通，亦唔覺配邊支酒適合。
第三道，龍眼蜜燒西班牙黑豚叉燒，配手上嘅紅酒好似未去到最夾，可能配白酒會好啲。
第四道，意大利番茄燴牛尾。茄粒味道出色，可惜菜式醬汁味道豐富，反而減少咗牛尾嘅突出。本來今晚最期待嘅Sena紅酒，配搭起上來亦無特別加乘，還是淨飲更好。
第五道，原個日本南瓜燴蛋白。南瓜溝上蛋白成茸，配搭上Off Dry Riesling酒，添加上了一份清新。
第六道，黑金流沙奶皇包賣相唔錯，亦唔會話太甜。今次就咁配上我哋嘅德國甜Riesling，令兩者得以提升。
最後一道，甜品桂花杞子配桃膠，配合上我哋嘅Tokaji 5度甜酒，甜甜對決，兩者將對方嘅甜抵銷咗，返而嚟得清淡，清新。
最後坐到12點埋單，平均每位$916。總結今餐，環境地理相當出色，過嚟約會氣氛一流。嘢食方面不過不失，價錢佔大部份都係場租。服務方面有求必應，亦可以因應客人要求而改變菜單，呢個方面係欣賞嘅。
