今次揀咗一間食評唔錯嘅酒吧，佢哋主打除咗特色嘅菜西餐之外，仲有就係佢哋買嘅手工啤酒 來自世界各地。
同朋友兩個人，都唔食得太多，叫咗個慢煮澳洲牛肋骨伴花生忌廉，仲有一個食評唔錯嘅鴨腿珍寶珠，仲有一個幾有特色嘅三文魚脆脆卷，最後當然點左佢哋嘅手工啤酒啦。要一提嘅就係佢哋嘅手工啤酒，種類非常之多，而且店主非常之有心思，標明每一種啤酒嘅麥味濃度同埋酒花香味有幾重，對於我哋呢啲唔係成日飲酒嘅人，非常之清楚。
鴨腿珍寶珠賣相好靚仔，香滑薯蓉包住一啲鴨腿絲去炸好香口好惹味，如果鴨腿絲嘅份量能夠再多啲就好喇。
三文魚脆脆卷個外皮非常之香脆，送酒小食一流。
佢個慢煮牛肋骨個汁非常之特別，係花生忌廉，好味道，牛肋骨肉質好淋，不過就略嫌有少少乾身，最可惜就係個汁嘅份量太少，得面頭一層，如果能夠畀番多啲汁就更加好味啦。
咁多樣嘢最欣賞嘅都係佢嘅手工啤酒，不愧為一間吧，我叫咗一個麥味唔係好重但花香味重嘅選擇，同個酒 list描述的一樣入口有淡淡嘅麥香，唔會好苦澀，又有花香味，非常易入口。
餐廳地方唔大， 但係因為係平日所以坐得都好舒服兼且服務好好，不過去飲唔去酒吧飲酒嘅人，成日要去洗手間，佢個洗手間喺後巷就有啲唔係咁方便啦，整體嚟講食物唔差但有進步空間。飲手工啤就無得頂…
