廉記冰室 (春園街) (Closed)

喺灣仔行完街，攰攰哋，就睇下利東街嗰邊有咩食，行下行下行到去春園街，見到有間好似茶餐廳嘅餐廳，叫廉記冰室，一入到去侍應姐姐熱情招待我們，好有親切感！呢間冰室嘅野食種類唔多，我哋分別叫咗啲小食同套餐，小食就有鮮菇菌奄列、吉列魚柳薯條沙律同吉列豬排沙律，而套餐就一人一個，燒羊架同燒豬手。呢度嘅奄列，蛋滑就唔在講，仲好足料，好多蘑菇粒；吉列豬排同魚柳都炸到外脆內軟，同薯條或者沙律食都好夾！到套餐喇，個燒豬手要大讚特讚，個豬皮好脆，豬手肉好稔，好似食緊火腿咁，佢呢度嘅set好特別，每個都配咗啲酸菜，幾開胃下；而個燒羊架燒到幾香，冰室嚟講算煮得幾好，如果佢嘅套餐份量可以再多小小，就更加好喇！冰室當然唔小得飲紅豆冰，紅豆冰紅豆多，又唔係好甜，真係絕配啊！大家可以去呢間新潮冰室試下！